Móðir mín er núna uppfull af heift í garð námsmatsstofnunar, sem sér um framkvæmd samræmdra prófa.
Fyrir því eru tvær meginástæður:
1. Nýbúar, sem hafa flust til Íslands og hafa margir hverjir aðeins verið á landinu í eitt ár, þurfa að taka sömu samræmdupróf og innfæddir Íslendingar. Það er að segja ef þeir ákveða að taka prófin, sem eru að sjálfsögðu valfrjáls. Nú, ef að þau ákveða að sleppa prófunum (sem í rauninni breytir ekki miklu því þau fá yfirleitt bara tvo í einkunn, af afar skiljanlegum ástæðum) liggur framtíð þeirra í núlláföngum, hversu gáfuð sem þau kynnu að vera í heimalandi sínu. (Mamma mín er nýbúakennari).
2. Áðan var ég að rembast við að læra undir samræmt próf í samfélagsgreinum sem ég ákvað að taka því ég er ekki viss um á hvaða braut mig langar eftir grunnskóla. Ég var eitthvað að kvarta í henni, eins og ég geri stöku sinnum, og sýndi henni inntakslista og fleira sem ætlast er til að við lærum. Ég nefndi einnig eitthvað um óréttlæti og lélega skipulagningu við framkvæmd þessara prófa. Þá varð hún líka svona bandsjóðandi vitlaus og ég vissi varla hvaðan á mig stóð veðrið (smá ýkjur kannski) og sagðist ætla að skrá mig úr þessu prófi um leið.
Upptalningu lokið.
Síðustu mínúturnar hefur hún verið að vinna að því að sannfæra mig, með miklum krafti, að ég eigi ekki að taka þátt í þessum skrípaleik íslenska menntakerfisins og er hún á góðri leið með það. Þó að ég hafi meiri áhuga samfélagsgreinum en náttúrufræðigreinum og mig langi að vissu leiti meira að stunda nám við félasgfræðibraut en náttúrufræðibraut er ég ekki viss um hversu mikinn þátt áhugasvið mitt spilar í þessu sambandi. Það er ótrúlega erfitt að læra undir þetta próf því sumt af þessu er eitthvað sem við höfum aldrei lært og ég er ekki viss um að ég vilji leggja það á mig og eiga á hættu að fá lægri meðaleinkunn en ella. Svo var mér sagt að ef mér líkar ekki námið á náttúrufræðibraut, get ég alltaf skipt eftir fyrsta ár, sama hvort ég tók samræmdaprófið í samfélagsfræði í tíunda bekk eður ei. Aðeins er litið á frammistöðuna á fyrsta ári í skólanum sjálfum.
Það er mjög freistandi tilhugsun að þurfa ekki að pæla í að læra undir þetta illa skipulagða próf, ég get einbeitt mér að öðrum greinum, s.s. stærðfræði og veitir nú ekki af því. Svo á ég líka afmæli 8. maí, sama dag og samfélagsfræðiprófið er svo ég gæti bara næstum því haft það gott á afmælisdaginn minn:)
Svo er auðvitað spurning hvort maður fær að sleppa prófinu, hvort ekki er orðið of seint að hætta við, en ég hef ekki miklar áhyggjur af því eftir að hafa séð mömmu mína taka bæðiskastið áðan.
Endilega shoutið out og segið skoðanir ykkar á þessu máli!
Hér að neðan er saga sem ég samdi fyrir systur mína og ætla ég einnig að leyfa ykkur að njóta góðs af henni.
Saga í tilefni Páskanna:
Einu sinni var páskaegg sem enginn vildi borða. En páskaegginu var alveg sama því eins og allir vita er mjög sársaukafullt og á engan hátt eftirsóknarvert að láta borða sig. Svo páskaeggið hélt áfram að lifa í sátt og samlyndi við heiminn.
Ég er bara svona í rólegheitunum að sparsla og ég er öll hvít. HAHAHAHAHA!!!!! Nei þetta var ekki alveg svona fyndið.
Annars er það svona í fréttum að herbergið mitt verður bráðum til (vonandi). Þá geta allir komið heim til mín og ég get alltaf haldið villt partý. Það er nú aldeilis gaman.
Kíkið á þetta. Ath! Ekki fyrir viðkvæma...........mikill viðbjóður. Veit satt að segja ekki hvort ég ætti að setja þetta á bloggið mitt en þetta er víst heimurinn í dag.
Haha! Það er svo gaman að horfa á fólk rífast í sjónvarpinu.
"Davíð er heiðarlegur, með mikla réttlætiskennd". Og nú hefur hann þurft að þola enn eitt skítakastið, dylgjurnar og hálfkveðnu vísurnar frá Ingibjörgu Sólrúnu. Greyið kallinn.
Jæja þá er enn einn skemmtilegur dagur næstum því að kvöldi kominn þar sem ég sit og læri allan daginn meðan aðrir geta gert hvað sem þeim sýnist. Eina leiðin til að komast heill á geði í gegnum þetta óendanlega leiðinlega tímabil er að hugsa svona:
- Það eru aðeins 27 dagar þangað til ég má gera það sem mér sýnist.
- Allir sem eru yngri en ég og eru að leika sér úti í sólskininu munu eftir nokkur ár standa í sömu sporum og ég.
- Meðan allir verða í prófum seinna í vor má ég gera hvað sem ég vil eftir að hafa tekið þýskupróf sem er ekkert mjög erfitt.
Nú er ég að spá í að skreppa í sund og synda smá því að sund er mjög heilsusamleg og alhliða líkamsrækt. Hún er ódýr, liðkar og styrkir líkamann, eykur þolið og síðast en ekki síst gefur brúnku á sólardögum ;)
Ég fór einmitt í sund í gær með Signýju og Steinvöru. Við syntum reyndar harla lítið, eiginlega hírðumst við í ískaldri grunnu lauginn allan tímann vegna þess að allir pottarnir voru fullir af sundkrökkum........bansettar frekjur >:| Og reyndar einhverju fleira fólki sem ég sá ekki því ég var ekki með gleraugun mín. Ekki það að sundkrakkar séu eitthvað sýnilegri en annað fólk, stelpurnar sögðu mér bara að það væru sundkrakkar og eithvað fleira fólk.
Ég vil nota tækifærið og benda ykkur sem ég þekki á að ef að þið hittið mig einhvern tímann í sundi er ekki víst að ég segi hæ því því það er allsendis óvíst að ég þekki ykkur ef þið eruð í ákveðinni fjarlægð.
Ég vil einnig biðjast fyrirgefningar á leiðinlegu bloggi þessa dagana. En það er ekki eins og maður geti skrifað eitthvað rosalega æðislegt þegar maður gerir ekki annað en að læra allan daginn...........
Það er svolítið langt síðan ég bloggaði síðast en það er vegna þess að síðustu daga hef ég ekki gert annað en að hanga heima og læra. Þá hefur maður eiginlega ekkert merkilegt að skrifa um.
Áðan var ég að lesa um seinni heimsstyrjöldina og mér varð óglatt við að lesa um ofsóknir nasista gegn gyðingum og öðrum "óæðri" kynstofnum. Ég skil ekki hvernig fólk getur ákveðið að útrýma 10 milljónum manna bara eins og hverri annarri dýraplágu. Fólkinu var sagt að þau væru að fara í bað og að allir fengju heitt kaffi á eftir. En um leið og klefarnir lokuðust var gasinu hleypt á. Svo liðu fimm mínútur og sá sem var ekki dáinn þegar klefarnir voru opnaðir voru skotnir um leið.
Í heimsstyrjöldinni síðari er talið að samtals hafi dáið um 35-50 milljónir manna. Það er um það bil 150 sinnum íbúatala Íslands.
Svo er eins og fólk hafi ekki lært rassgat á þessu öllu og hálfvitar eins og Bush Bandaríkjaforseti komast til valda og ógna heimsfriðnum á ný.
