Gunnhildur litla systir mín er í Vesturbæjarskóla, í fjórða bekk. Áðan sagði hún mér frá atviki sem átti sér stað inni í kennslustund í dag.
Hún hafði verið inni í heimakrók að puttaprjóna í rólegheitunum þegar hún sá hvar ónefndur bekkjarbróðir hennar var eitthvað að fikta í böngsunum hennar. Hún bað hann vinsamlega um að hætta því en það fer ekki betur en svo að strákurinn snýr sér við og kallar systur mína hóru.
Ég endurtek: þau eru í fjórða bekk.
Þetta er bara eitt það sorglegsta sem ég hef heyrt.
Geitungar hafa lagt undir sig húsið mitt og þá aðallega baðherbergið. Ég er í alvörunni farin að hafa verulegar áhyggjur af þessu. Um daginn fann ég einn lítinn geitung í vaskinum mínum þegar ég var að tannbursta mig og ég drap hann sem skjótast með raksápu. Ég sé núna að það hefði ég aldrei átt að gera. Vinir hans og fjölskylda eru nefnilega farin að leita á hefndir við mig. Í morgun þegar ég var að tannbursta mig fann ég annan geitung í vaskinum mínum, sem ég drap með sama hætti og þann fyrri en svo þegar ég sneri mér við sá ég hvorki meira né minna en ÞRJÁ geitunga skríðandi um á gólfinu, einn í gluggakistunni og einn bakvið sturtuklefann, þeim sama og ég hafði verið í sturtu í örfáum mínútum áður. (Svo er einn dauður í gluggakistunni í herberginu mínu) Sjitt þetta var bara eins það gerist best í verstu hryllingsmyndum.
Ég er ekkert sérstaklega hrædd um að þeir stingi mig, enda gerðu þeir enga tilraun til þess. Málið er bara að geitungar eru ógeðslegustu og ljótustu kvikindi sem ég veit um, allavega af þaim sem lifa á Íslandi. Það er eins og þeir séu að detta í sundur í miðjunni og svo eru þeir svo ótrúlega ljótir á litinn.
Og svo ég er rosa hrædd um að einhver geitungur ákveði að leggjast í dvala bakvið sturtuklefann minn, því þar er svo hlýtt og notalegt, og vakni svo þegar fer að vora, búi til geitungabú og drepi síðan alla fjölskylduna mína.
Mér datt reyndar í hug að geitungarnir séu komnir til að drepa litla bróður minn. Hann er nefnilega með starfsemi í gangi sem gengur út á að drepa geitunga og safna þeim saman ofaní gamalt tyggjóbox.....................
Endilega - ef einhver getur gefið mér ráð um hvernig er hægt að losna við þessi kvikindi þar sem raksápa kemur ekki við sögu má hann endilega commenta.
Ég var að uppgötva mér til mikillar skammar að ég er bara búin að blogga fimm sinnum síðastliðinn mánuð, sem er náttúrulega engann veginn nógu gott mál. Ég held að það stafi eingöngu af því hversu ljótt að útliti þetta blogg er en ég nenni ekki að breyta því, það er sko allt of mikið vesen.
Nú ætla ég samt sem áður að rita örfáar línur fyrir þá örfáu einstaklinga sem lesa þetta.
Hún hefur kannski ekki farið fram hjá mörgum eftir þær hatrömmu umræður sem hafa átt sér stað hér í kommentakerfinu mínu sú óumflýjanlega staðreynd að ég er komin á ofurbusalista Kvennaskólans. En ég er svosem búin að sætta mig við það. Vona bara að ég þurfi ekki að gera neitt hræðilegt.
Jæja ég held að ég láti þetta nægja fyrir daginn í dag.
Þetta blogg er eiginlega farið að hafa slæm áhrif á mig. Ég sest við tölvuna í fullkomlega góðu skapi og ákveð að blogga smá en svo dettur mér ekkert í hug til að blogga um og þá verður mér ljóst hversu viðburðasnautt og óspennandi líf mitt er. Kannski ætti ég bara að hætta þessu til að komast hjá því að leggjast í þunglyndi.......................
