Það hafa sjö Danir heimsótt síðuna mína. Ég leyfi mér að álykta að það sé vegna heiti bloggsins míns, På Torsdag. På Torsdag en nafn einnar hljómsveitar minnar. Hún var stofnuð þann 19. desember, á fimmtudegi, árið 2002. Ég veit ekki hvort þið hafið heyrt eitthvað með henni, hún hefur endurgert og remixað lög eins og Pósturinn Páll og fleiri. Sveitin hefur þó verið óstarfandi að mestu síðastliðið ár.
Ég er næstum því búin í prófum. Á bara eftir dönskuna og hef fjóra daga til að læra undir það, sem er asnalegt. En ég ætla bara að nýta helgina í að skreyta heima hjá mér og gera allskonar jólalega hluti.
Þá er þetta afstaðið. Æ það var svo ótrúlega gaman. Ég ætla aftur á Muse tónleika einhverntímann í náinni framtíð. Ég bara hef ekki upplifað jafn skemmtilegan hlut.
Ég stóð eiginlega allan tímann aftarlega til hliðar með Steinvöru, Signýju og síðan Guggu þar sem voru harla fáir og við sáum yfir allt sviðið og gátum hoppað að vild sem var frábært. Reyndar var fullt af fólki sem horfði á okkur skýtnum augum og ég hefði örugglega gert það sama ef væri ekki svona eins og ég er en mér er nú bara alveg sama. Svo eftir að þeir voru klappaðir upp og tóku Blackout tróð ég mér með Agli næstum því alveg að sviðinu þar sem var gífurleg stemmning og svo byrjuðu þeir að spila Stockholm Syndrome og þá varð allt klikkað. Svo komu pappírssnifsi og risastórar blöðrur fljúgandi úr loftinu sem voru síðan sprengdar og úr þeim komu fleiri pappírssnifsi sem festust í hárinu mínu. Og svo náði Egill í rifrildi úr sprunginni blöðru sem er náttúrulega bara magnað og þetta mun hann eiga til minningar um ókomna framtíð. Ég kýs að trúa því að Matt Bellamy sjálfur hafi blásið upp blöðruna.
Svo kom ég glöð og ánægð heim með líkamsvessa af svona hundrað mismunandi manns á mér.
Þetta voru bara magnaðir tónleikar....ekki hægt að segja annað. Ég hefði reyndar viljað heyra þá spila The Small Print og kannski eitthvað fleira. En hvað um það......ég er mjög sátt.
Rétt í þessu var ég að átta mig á því hvað ég er að fara að gera í kvöld. Ég er að fara á Muse tónleika. Ekki það að ég hafi ekki áttað mig á því að það væri í kvöld, ég var bara ekki búin að átta mig á því að ég væri að fara á Muse tónleika. Ég held samt að ég sé ekki enn búin að því. Ég er eitthvað svo óvenju róleg miðað við aðstæður. Er bara að læra svona í rólegheitunum um sólargang, kortagerð og fleira spennandi.
Annars er ég að lesa stórgóða bók sem ég á mjög erfitt með að slíta mig frá sem er ekkert svo gott svona í miðjum prófunum. Ég sem les nánast aldrei bækur. Ég á nefnilega við þann vanda að stríða að ég get ekki lesið bækur sem mér finnst ekki skemmtilegar. Ég bara get ekki klárað bók nema að efni hennar veki ómældan áhuga minn og athygli. Þess vegna heyrir það til tíðinda þegar ég festist í bók. Og það þarf endilega að gerast í miðjum prófum.
Þá er íslenskuprófið búið sem þýðir að nú eru bara fjögur próf eftir. Og svo eru það bara Muse ekki á morgun heldur hinn. Jeijjj.....
Við röltum niður í bæ áðan eftir prófið og söngluðum jólalög fyrir gangandi vegfarendur. Ég ætla að leggja það fyrir mig í jólafríinu, tölta glöð í bragði um bæinn og syngja með bjöllur. Og jafnvel banka upp á hjá fólki. Ég mun eflaust kæta nokkrar aumingjans sálir. Þetta verður sem sagt góðverkið mitt þessi jól. Hver er með?
Svo komum við við (haha, við við) í MR og hittum þar fyrir ekkasogandi nemendur eða allavega leiða nemendur sem voru að ljúka stærðfræðiprófi. Ég segi kannski ekki ljúka, því það náðu víst fáir að klára prófið. En það var þeirra eigin val að fara í þennan skóla miskunnarleysis.
Nú tekur jarðfræðin við. Ég ætla samt fyrst að fá mér að borða og lesa ögn í Mýrinni sem ég byrjaði að lesa í gær því það kom jú á daginn að ég gat ekki sofnað, eins og ég óttaðist svo mjög.
Ég þori ekki að fara að sofa af ótta við að verða aftur andvaka til þrjú eins og fyrir stærðfræðiprófið. Það var ekki gott. Ég gat samt alveg reiknað eitthvað að ráði, ég vona bara að það sé ekki allt morandi í svefnleysisklaufavillum.
Musetónleikar ekki á morgun, ekki hinn heldur hinn.
Á maður að nenna eða tíma á einhver jólaböll? Stuðmenn verða á MR ballinu sem er á Nasa svo ég tel mjög ólíklegt að maður nái miða á það. Það eru bara 250 miðar á Kvennóballið sem er haldið með MS........tissss.
Ég hugsa að ég finni bara einhverja aðra leið til að skemmta mér, ég er nú svo góð í því.