Það er komið sumar...eða allavega vor. Ég nefnilega heyrði í hrossagauki í morgun þegar ég var að labba í sveitinni, þ.e. Grafarvoginu, til að fá íþróttamætingar. Það var mikil gleðistund í mínu hjarta. Stuttu seinna heyrði ég í lóu. Persónulega finnst mér þó hrosagaukshljóðið flottara en það er svo töff, það kemur úr stélinu. Það minnir mig svo mikið á sumarið og sveitina og tjaldferðir og fjallgöngur og gras og sól. Og lítil, bleik blóm. Og krækiberjalyng.
Ég labbaði líka í Elliðaárdalnum í dag, líka til að fá íþróttamætingar. Til samans labbaði ég því um 17 kílómetra í þeim tilgangi. Dagurinn einkenndist því mikið af labbi en að því loknu fór ég í sund og soðnaði í heita pottinum í næstum klukkutíma. Það var afskaplega endurnærandi.
Jahá...svo hef ég þau tíðindi að færa ykkur að í dag lauk ég fyrir (næstum) fullt og allt skólagöngu minni í Borgarholtsskóla. Það vekur blendnar tilfinningar, maður á nú eftir að sakna hins og þessa og hinna og þessara. Samt...tímamót eru alltaf skemmtileg og flestar breytingar af hinu góða. Það finnst mér.
Ég get ekki ákveðið hvað það er sem ég hlakka mest til í sumar. Það er gott en flókið vandamál sem ég ætla að einbeita mér að því að leysa næstu daga.
En fyrst...fyrst ætla ég að fara að sofa og sofa alveg þangað til að ég vakna.
Félagsfræðibókin mín er afskaplega leiðinleg bók. Jafnvel ein sú leiðinlegasta sem ég hef á ævi minni lesið. Ástæða þess er hugsanlega sú staðreynd að hún gæti verið a.m.k. helmingi styttri ef höfundurinn hefði takmarkað notkun orðsins ,,tiltekinn”, sem er u.þ.b. annað hvert orð og eitt merkingarlausasta orð sem ég veit um, við eitt slíkt á blaðsíðu. Hver er til dæmis munurinn á því að segja ,,maður fór út í búð” og ,,tiltekinn maður fór út í búð”? Einnig hefði hjálpað ef höfundur hefði einskorðað sig við setningar sem eru færri en 10 línur að lengd en fela engu að síður í sér svipað fræðslugildi.
Þar að auki eru svona 23 innsláttarvillur á blaðsíðu.
Ekki bætir úr skák að þetta er tilraunaútgáfa sem gerir það að verkum að ég mun líklega ekki geta selt hana þegar ég er búin að nota hana. Og þó, þá get ég bara notið þess að brenna hana eftir prófið á morgun.